Ertzaintzaren Arkauteko akademiatik gasolio-isurketa bat eman da ibaira

Zadorra Bizirik ingurumenaren aldeko plataformak kezka eta gaitzespen sakona erakutsi du Ertzaintzaren Akademiak egin duen gasolio-isuriaren aurrean. Gertakari hori urtarrilaren 2an detektatu zen, eta azken urteetako laugarren isurketa izan da, substantzia arriskutsuen kudeaketan behin eta berriz zabarkeriaz jokatu dela agerian utziz, izan ere, azken urteetan 2002, 2017, 2018 eta 2024ean errepikatu dira gertakari hauek.

Errekabarri ibaira gasolio-ihesa izan zela ikusi ondoren, presako neurriak ezarri ziren haren hedapena geldiarazteko. Horren barruan, hidrokarburoak xurgatzeko hesiak jarri ziren ibaiaren ibilguan. Ahalegin horiek egin arren, gasolio ugari geratu zen harrapatuta guneko araztegian, eta, ondorioz, zisterna-kamioien bidez atera behar izan zuten.

Egoeraren larritasuna urtarrilaren 7an areagotu zen, euriteen ondorioz metatutako gasolioa azaleratu zenean, usain sarkorra sortuz eta ibaiaren kutsadura areagotuz. "Horrek agerian uzten du egungo prebentzio-neurrien eraginkortasunik eza eta irtenbide eraginkorragoak eta behin betikoagoak ezartzeko premia", adierazi du Zadorra Bizirik-ek.

Gertakariak kezka ekologiko handiak sortzen ditu, batez ere Salburuako nazioarteko hezegune garrantzitsuetan izan dezakeen eraginagatik. Zadorra Bizirik-ek hezegune horien garrantzia azpimarratu du, baita petrolio-isurketek eragindako kutsaduratik babesteko beharra ere.

Plataformak agintariei dei egiten die berehalako ekintzak har ditzaten gertakariaren kausak ikertzeko eta egoeraren larritasunarekin bat datozen zigorrak aplika ditzaten. Gainera, prebentzio-neurri gehiago ezartzea eta arriskutsuak izan daitezkeen produktuak erabiltzen dituzten instalazioen gaineko kontrol zorrotzagoa eskatzen dute. "2002. urteaz geroztik egindako isurketen historia onartezina da, eta Ertzaintzaren Ikastegian segurtasun protokoloa zehatz-mehatz berrikusteko beharra" nabarmentzen du Zadorra Bizirik-ek.