ePub
pdf
Absolbitu egin dute lankide bat bortxatu izanaz akusatutako Donostiako udaltzaina
Auzitegiak argudiatu du "ezin dela frogatu" alkoholak emakumearen nahia baldintzatu izana, edo erasotzailea egoeraz aprobetxatu zela.
El Diario Vasco egunkariak jaso du albistea. Bizkaiko Probintzia Auzitegiak absolbitu egin du lankide bat bortxatzeaz akusatutako gizonezkoa. Auzitegiaren argudioen arabera, aurkeztutako frogak "ez dira nahikoak" bortxaketa bat izan zela epaitzeko. Epailearen ustez, ez dute frogatzen erasoaren unean gizonezkoa jakitun zela ez zuela emakumearen baimenik edo alkoholak erabakian eragin zuela.
2023ko Bilboko Aste Nagusian gertatu zen, abuztuaren 21eko gauean. Lanetik ezagutzen ziren biak, Donostiako udaltzainak baitziren. Festan laneko ezagunekin topo egin zuten eta, gauean zehar elkarrekin egon eta gero, gizonezkoaren lagun baten etxera joan ziren. Gizonezkoak deklarazioan esan zuen emakumea "mozkorra, baino kontziente" zegoela. Ordea, emakumeak deklarazioan azaldu zuen ez zuela apenas gogoratzen gertatutakoa, eta, are gehiago, azpimarratu zuen gogoan zuela momentu batean gizonezkoak zerbait iradoki ziola eta berak ezin zuela hitzik ahoskatu. Epaiketaren unean berretsi zuen berak ez zuela harreman sexualik eduki nahi.
Erasoa gertatu eta bi egun geroago, emakumeak salaketa jarri zuen eta ikerketa abiatu zuten. Fiskaltzak bortxaketa izan zela ondorioztatu zuen eta bederatzi urteko kartzela zigorra eskatu zuen akusatuarentzat. Aurkeztutako frogetako bat emakumeak eta gizonezkoak gau hartatik gutxira edukitako deiaren grabaketa izan zen, non gizonezkoak emakumeari leporatu zion "ez ziola ezetz esan" eta iradoki ziola "gauza bera nahi zuela".
Hori da hain justu absoluzioaren arrazoi nagusiena, emakumea "ez zela ukatu". "Gure ustez, orain arte aurkeztutakoa, argi eta garbi, eskasa da akusatua egotzitakoaren egile dela berresteko", esan dute magistratuek. Ikerketaren arabera, ez zen droga kontsumorik edo indarkeriarik egon tarteko. Nahiz eta biak alkoholaren eraginpean egon, Bizkaiko Auzitegiak absolbitu egin du erasotzailea, argudiatuta "ezin izan dela frogatu" erasotzaileak ez zuela kontuan hartu edariak emakumearen nahia baldintzatu zuela edo egoeraz aprobetxatu zela.
