Alde Hemendik mugimenduak atzerriko indarrak joatea eskatu du hamabost herritan

Maila nazionaleko mobilizazioa eguna antolatu du Alde Hemendik mugimenduak. 19.30etatik aurrera hamabost herritan manifestazio koordinatuak egin dituzte «Alde hemendik, utzi bakean Euskal Herrian» lemapean.

Hain zuzen ere, Agoitz, Altsasu, Bilbo, Durango, Eibar, Elizondo, Galdakao, Gernika, Lekunberri, Laudio, Oñati, Ordizia, Iruñea, Leitza eta Zarautzen izan dira mobilizazioak.

«Gerra egitera eta gure herria zapaltzera etorritako indar militar eta polizialek ez daukate lekurik hemen, soberan daude. Euskal herritarroi aske bizi eta izateko eskubidea etengabe zaigu urratua. Indar armatuengatik jasaten ditugun kontrol, intimidazio eta mehatxuak gure eguneroko ogia dira. Bakera bidean, pauso irmo eta atzeraezinak eman behar direlakoan gaude, baina badirudi batzuek herritarren eskakizun eta nahiei entzungor egiten jarraitu nahi dutela», adierazi zuten Alde Hemdnik mugimendua aurkezteko Altsasun egin zuten agerraldian.