Dornier-eko langileak beste behin mobilizatu dira lan-hitzarmen berri baten alde

Iruñeako gune urdina kudeatzen duen Dornier enpresako langileek elkarretaratzea egin dute larunbat honetan, 13:00tan, Iruñeako Udaletxe plazan. Horren helburua azken urteetan erosteko ahalmenaren % 12ko galera berreskuratzea eta negoziatzeke dagoen hitzarmenean beste lan-hobekuntza batzuk sartzea da.

Mobilizazioan, langile batek azaldu zuen enpresak ez duela erakutsi negoziatzeko borondaterik eta errepresaliak egon direla lehen greba-deialdiaren ostean. "Grebaren lehen abisuarekin, 18 urtez enpresaren parte izan den langile bat kaleratu dute. Aste honetan, oso hutsegite larria egotzi diote lankide bati, autoan tiket bat ez jartzeagatik, orain arte, abisu batean geratzen zena. Neurria erabat lekuz kanpokoa iruditzen zaigu, izan ere, kaleratzean amai dezakeen hutsegitea baita. Enpresaren mendekua da, gu beldurtzeko". Azaldu zuenez, enpresak "ez du fitxarik mugitu" eta ez die deitu. Greba eta protesta egun hori "egoera hau desblokeatzeko eta langile guztientzako hitzarmen duin bat negoziatzeko borrokan jarraitzeko da".

Larunbateko lanuzteak bat egin du langileek aurten hasitako mobilizazio zikloarekin: langileek hiru greba egun egin zituzten martxoaren amaieran, Aste Santua baino lehen, enpresari hitzarmena "benetan negoziatzeko" eskatzeko; eta apirilaren 17an, asteazkenean, bi orduko geldialdia egin zuten.