ePub
pdf
Greba mugagabe luzea espero dute zabor bilketako langileek
Aiaraldeko Kuadrillako zerbitzuaren langileek astelehenean abiatu zuten greba mugagabea erosmen ahalmena eta asteburuko lanaldiak hobetzeko.
Atzo bi greba mugagabe hasi ziren Aiaraldean garbiketaren esparruan. Amurrioko kale garbitzaileen kasuan, egunean bertan lortu zuten aurreakordioa PreZero enpresarekin, baina Aiaraldeko Kuadrillako zabor bilketaren kasuan, badirudi gatazka luzatuko dela.
Horrela adierazi dute euren ordezkariek gaur bertan Laudioko Herriko plazan egindako elkarretaratzean. Izan ere, PreZero enpresak (bi zerbitzuen esleiduna dena) atzo ohartarazi zien ez zuela egindako eskaintza hobetuko. Ondorioz, grebak iraungo duela uste dute beharginek.
Langileen aldarrikapenak
ELA sindikatuak argitu duenez, bi dira beharginen aldarrikapen nagusiak. Alde batetik, erosmen ahalmena hobetzea, KPIren tamainako soldata igoera lortuta, gutxienez. Dirudienez, PreZerok hori emateko prestutasuna adierazi zuen greba baino hiru egun lehenago.
Askatu gabeko korapiloa, berez, asteburuetako lanaldian datza. Izan ere, langileek asteburuetako egutegia hobetu nahi dute. Gaur egun, bi astean behin asteburutan aritzen dira eta konpainiak soilik eskaini die lana arintzea plantillaren erdiari. ELAk aldarrikatu duenez, neurri hori behargin guztiei aplikatu beharko litzaieke onargarria izateko.
Aiaraldeko Kuadrilla
Bide batez, ELA sindikatuak exijitu dio Aiaraldeko Kuadrillari PreZerorekin harremanetan jartzea euren aldarrikapenak aintzat har ditzan. Langile erakundeak aipatu du Laudio, Amurrio, Okondo, Aiara eta Artziniegaren zerbitzua kudeatzen duen instituzioa ez dela bitartekari hutsa eta ardura zuzenak dituela gatazkan, zerbitzua publikoa den neurrian.
Bere aldetik, Kuadrillak atzo zabaldu zuen gutxieneko zerbitzua %40koa izango dela grebak iraun bitartean.
