Herri Norte Taldeko 5 kide atxilotu dituzte

Ertzaintzak Herri Norte taldeko bost kide atxilotu ditu gaur goizean. Atxilotuak Bilboko ertzain-etxera eraman dituzte momentuz, Guardiako Epaitegian epailearen esku utzi arte. Atxilotutako pertsonei «desordena publikoak, gorroto-delituak, lesioak, mehatxuak eta kalteak» leporatu dizkiete Bilboko ostalaritza-lokal batean eman ziren gertakarien harira. Egun horretan, otsailaren 29an, Athleticek eta Atletico Madrilek Kopako partida jokatu aurretik bi taldeko zaletuen artean liskarrak egon ziren San Mames estadiotik gertu dagoen ostalaritzako lokal batean. Gainera, beste gizon bat ere ikertzen ari dira, beraz, ez da baztertzen atxiloketa gehiago egotea.

Gertakari hauen aurrean Herri Norte Taldeak atxilotuen askatasuna exijitu du sare sozialen bidez.