ePub
pdf
Amaitu dute Maderas de Llodioko greba
"Lanera itzuli nahi izan duten pertsona kaleratuen onarpena" lortuta eta eskualdearen inplikazioa eskertuta amaitu dute greba.
Amaitutzat eman dute Maderas de Llodioko langileen greba mugagabea, 283 egunen ostean, eskualdeko historiako grebarik luzeena bilakatuta. Astelehen arratsaldean egin dute grebalariek azken mobilizazioa, bukaera emateko “duintasunez, erabakitasunez eta modu kolektiboan” egin duten borrokari.
Zumalakarregi etorbidearen hasieran jarri dute zita 18:30ean, eta Herriko plazaraino joan dira manifestazioan, bidean herritar zein merkatarien elkartasun keinuak jasota.
Agerraldia egin dute jarraian udaletxearen aurrean, enpresarekin lortutako akordioaren zertzelada ugari partekatzeko. Lorpen nagusia aipatu dute lehenbizi: “Lehenik eta behin, jakinarazi nahi dugu gaur egin direla lanera itzuli nahi izan duten pertsona kaleratuen onarpenak. Gaurtik aurrera, lankide horiek Maderas Llodioko plantillako kide izango dira”. Nabarmendu dutenez, hori zen greba abiatu zutenean zuten aldarrikapen nagusietako bat. “Gaur harrotasunez esan dezakegu helburu hori bete dela”, nabarmendu dute.
Horrekin batera, gogorarazi dute Euskal Autonomia Erkidegoko Auzitegi Nagusiak bidegabetzat jo zituela Garnica multinazionalak ezarritako 35 kaleratzeak, eta jakinarazi dute epai hori irmoa bilakatuko dela. Gauzak hala, grebalariek uste dute “argi” geratu dela “enpresak ez zuela enplegu-erregulazioko espedientea justifikatzeko arrazoi objektiborik”.
Gaur sinatuko dute aipatutako guztia jasotzen duen akordioa eta, duela astebete iragarri bezala, asteazkenean itzuliko dira lanera.
Hori kontuan izanda, orain arte eginiko borroka balioan jarri dute beharginek. “Langileok inposaketa horri aurre egin izan ez bagenio, gaur egun ez ginateke posizio hobean egongo eta ez ginatekeen gai izango atzeraezina zirudien erabaki bati buelta emateko”, ziurtatu dute.
Horregatik aldarrikatu dute “borrokak beti merezi” duela: “Borrokak tresnak ematen dizkigu enpleguaren, plantillen eta gure eskualdeko etorkizun industrialaren aurka egiten duten enpresa-erabakiei aurre egiteko”.
Jaurlaritzaren eta Aldundiaren jarrera salatu dute
Negoziazio prozesua “bereziki gogorra eta konplexua” izan dela ere aipatu dute Herriko plazako hitzartzean. Azaldu dutenez, “bi negoziazio-prozesu” behar izan dira, eta enpresak “langileekiko immobilismo- eta mendeku-jarrera” izan du. “Jarrera horrek izugarri zaildu du edozein aurrerapen, eta gatazka hau guztiok nahiko genukeena baino askoz gehiago luzatzea eragin du”.
Eta Arabako Foru Aldundia eta Eusko Jaurlaritza ez dira zegokien mailan egon, grebalarien aburuz. “Gure ustez, ez dira mahai gainean jarri eskura dauden tresna guztiak, eta ez da bitartekotza-prozesu bat gidatu, gatazka modu bidezkoagoan eta eraginkorragoan desblokeatzeko behar den irmotasun, azkartasun eta anbizioarekin”, salatu dute, eta ohartarazi dute lan-gatazkak ezin direla alferrik luzatu “enplegua, langileen duintasuna eta gure eskualdeko etorkizun industriala jokoan daudenean”.
Eskerrak Aiaraldeari
Eskualdeari eskerrak ematen amaitu dute ekitaldia: “Eskerrik asko elkartasun adierazpen bakoitzagatik, babes keinu bakoitzagatik eta borroka hau inoiz ez dela Maderas Laudioko langileena bakarrik izan erakusteagatik, baizik eta enplegua defendatzea Aiaraldearen etorkizuna defendatzea dela ulertu duen eskualde oso batena”.
Horren ostean, Udaletxeko balkoira igo dira beharginak, bertan itxialdia egin zutenean eskegi zuten bandera jaitsi eta “Eskerrik asko Aiaraldea!” zioen pankarta jartzeko, Arloteek hainbat abesti kantatzen zituzten bitartean.
