Amaya Zabarteren auzia itxi du epaileak

Donostiako Instrukzio Epaitegiko epaile batek Amaya Zabarteren auzi ixteko erabakia hartu du, Ertzaintzako agenteek egindako deklarazioetan oinarrituta. Akusazioak jada jaso du ebazpenaren berri, eta defentsa helegitea aurkezteko asmoa erakutsi du. Erreforma errekurtsoa aurkeztuz gero, epaile berak aztertu beharko du berriro auzia, eta ez onartuz gero, apelazio errekurtsoa aurkezteko aukera izango dute Probintzia Auzitegian.

Erabakiak etsipena eragin du familian; izan ere, hasieratik kritikatu dute epailearen jarduna. Gogorarazi dute auziaren hasieran ere kasua artxibatu zuela epaile berak, “delitu zantzurik ez” zegoela eta ustezko egilea identifikatzea “ezinezkoa” zela argudiatuta. Haien ustez, gertakariak nahikoa larriak ziren ikerketa sakonagoa egiteko, baina instrukzioak ez du bide hori jarraitu.

Gertakariak 2024ko martxoaren 5ean izan ziren, Realaren eta Paris Saint-Germainen arteko Txapeldunen Ligako partidaren atarian, Anoetan. Amaya Zabarte Errondo pasealekuan zegoen, sakelako telefonoarekin seinalearen bila, istiluetatik kanpo, Ertzaintzaren oldarraldiak harrapatu zuenean. Foam jaurtigai batek eta ertzain baten ostiko batek zauri larriak eragin zizkioten buruan; kaskezurra bi lekutan hautsi zitzaion, eta ospitaleratu behar izan zuten, bere bizitza arriskuan egon zelarik.

Instrukzioan zehar, familiak salatu du urtebete baino gehiago igaro zela Zabarteri deklarazioa hartu aurretik, eta galdeketa hamar minutura mugatu zela, batez ere izaera administratiboko galderekin. Era berean, lekuko nagusia berandu deitu zutela kritikatu dute. Lekuko horrek epailearen aurrean adierazi zuen ikusi zuela ertzain batek ostikoa ematen ziola Zabarteri, eta zenbait irudik ere hori iradokitzen dutela azaldu zen. Hala ere, epaileak lekukoarekin “oso zorrotz eta erasokor” jokatu zuela salatu du defentsak; gaztea negarrez atera zen deklarazioaren ondoren.

Aitzitik, auzian deklaratu duten ertzainen testigantzek pisu handiagoa izan dute epailearen erabakian. Agente batzuek adierazi zuten ez zutela gogoratzen non jaurti zituzten foam balak, eta beste batzuek ukatu egin zuten gertakariak jazotako eremuan tiro egin izana. Epailearen arabera, “ezinezkoa” da zehaztea foam jaurtigai batek eragin ote zituen Zabarteren zauriak, eta zalantzan jarri du, halaber, ostiko baten existentzia. Gainera, auzi-medikuaren txostenak ez du argitzen zaurien jatorria, ezta kolpea eragin zuen objektua zein izan zen ere.

Ez da auzi bakarra: egun hartan beste bi emakumek ere salaketak jarri zituzten, eta haien kasuek aurrera jarraitzen dute oraingoz. Gainera, hirugarren salaketa bat ere badago: Ertzaintzaren SIR-X jaurtigai batek beste emakume bati lepoan jo ziola salatzen du; kasu horretan ere, hasierako artxiboaren ondoren, auzibidea berriz irekitzen saiatu dira.

Oro har, familiak eta defentsak uste dute instrukzioan izandako jarduna ez dela egokia izan, eta epailearen jarrera “hotza” eta, une batzuetan, “mehatxatzailea” izan dela

salatu dute.