EAK-k erabakiko du ea lanpostu guztiei euskara-eskakizuna eskatzeak konstituzioa urratzen duen

Euskal Autonomia Erkidegoko Auzitegi Nagusiko Administrazioarekiko Auzietako Salako Hirugarren Sekzioak erabaki du Espainiako Konstituzio Auzitegiari galdetzea ea Euskal Enplegu Publikoaren Legearen 187.5 artikuluak (administrazioko hizkuntza-eskakizunei buruzkoa) Espainiako Konstituzioa urratzen duen ala ez. Erabaki horren aurka ezin da errekurtsorik aurkeztu.

PPk eta Voxek helegiteak jarri zituzten sektore publikoan euskararen erabilera normalizatzeko dekretu berriaren kontra. Dekretu berri hau Eusko Jaurlaritzak iaz onartu zuen. Hala ere, PPrena bertan behera utzi dute, Voxena erabaki arte, hari eragiten diolako eta funtsezko elementu komunak dituztelako.

Espainiako Konstituzio Auzitegiak aztertuko duen artikuluak honako hau adierazten du: "Euskal administrazio publikoetan dauden lanpostu guztiek, horien instituzio eta organismoek, aldi baterakoak edo egoeraren araberakoak barne, dagokien hizkuntza-eskakizuna izango dute, lanpostu horiei eta xede horretarako eska daitezkeen hizkuntza-trebetasunei esleitutako komunikazio-ezaugarri eta -beharren arabera zehaztuta". EAEko Justizia Auzitegi Nagusiaren iritziz, artikulu horrek baldintzatu egiten du Voxek eta PPk aurkeztutako errekurtsoei buruzko behin betiko epaia, eta beharrezkotzat jotzen du Espainiako Konstituzio Auzitegiak ebaztea legearen atal hori Konstituzioarekin bat datorren ala ez, ebazpena eman aurretik.

EAEko Justizia Auzitegi Nagusiaren autoaren arabera, lanpostu guztiek hizkuntza-eskakizuna izan behar dutela exijitzea ez du orain arte Espainiako Konstituzio Auzitegiak aztertu , eta zalantza konstituzionala "justifikatzen duten arrazoi ugari" daudela uste du. "Hizkuntza-eskakizuna lanpostu guztiek izatea, eta ez bakarrik proportzionaltasun-printzipioaren arabera ezarri daitezkeenak, objektibotasunez disuasio-elementua da enplegu publikoa lortu nahi dutenentzat eta euskaldunak ez direnentzat", esan du auzitegiak.

Bestetik, aurreratu du Espainiako Auzitegi Konstituzionalak eman izan duela hizkuntza koofizialei buruzko iritzia, eta, konstituzioaren 23. artikuluan oinarrituta, proportzionaltasunak esan nahi duela ezin dela hizkuntza koofiziala jakitea eskatu lanpostu guztietan. Honela dio 23. artikuluak: “Era berean, herritarrek eskubidea dute, berdintasun-baldintzetan eta legeek ezartzen dituzten betekizunekin, funtzio eta kargu publikoetara heltzeko”.

Erabaki hau hartu behar zuten magistratu guztiak ez daude ados kontsulta egiteko erabaki horrekin. Hiru magistratuetako batek boto partikularra eman du, uste baitu Enplegu Publikoaren Euskal Legearen artikulu horrek ez duela "inolako desorekarik eragiten gaztelaniaren aldean".