Iban Apaolaza euskal preso politiko ohia zendu da

Guztiz aske izatea lortu gabe zendu da Iban Apaolaza euskal preso politiko ohia. Igande gauean, preso ohiaren senideek desagerpenaren berri eman zuten, goizean mendira irten eta etxera itzuli ez zelako. 54 urteko beasaindarra hilik topatu dute astelehen honetan Oiartzunen, Aiako Harrian.

2007ko ekainean atxilotu zuten, Quebecen(Kanada). Espainiara estraditatzeko aginduaren aurrean Apaolazak helegitea jarri zuen Kanadako Justizia Epaitegian, baina Administrazio kanadiarrak atzera bota zuen erabakiaren aurkako azken helegitea. Kanporatua izan ostean Espainiako Poliziaren esku geratu eta torturatua izateko arriskua zuela iritzita egin zuen gose greba Apaolazak. Prozesuan zehar bere abokatuak etengabe salatu zituen irregulartasunak eta, ondorioz, kanporaketa erabakitzeko bista bitan atzeratu zen. Azkenik, martxoaren amaieran egin zen eta maiatzean kanporaketa onartu zuten. Epai honen ondorioz, 2008an Espainiaren esku utzi zuten.

Espainiaratua izan ondoren, ETAko kide izatea egotzita epaitu eta 123 urteko zigorra ezarri zioten. Hirugarren graduan zegoen iaztik. Ez zen EPPK-ko kidea.