Lan-istripuetako heriotza-tasak %42 egin du gora EAEn, 2023ko datuekin alderatuta

Guztira 17 pertsona hil ziren lan-istripuz urteko lehen lau hilabeteetan EAEn, hau da, iaz aldi berean izandako 12 hildakoak baino % 42 gehiago. Era berean, % 71,4 hazi zen zauritu larrien kopurua, 84 izan baitziren; aurreko ekitaldian, berriz, 49 izan ziren larri lesionatuak. Osalanen datuen arabera, urtarriletik apirilera baja eragin zuten 14.470 lan-istripu jakinarazi ziren EAEn, hau da, %12ko igoera izan zen iazko aldi beraren aldean, 1.562 ezbehar gehiagorekin. 

Zifra horietan sartzen dira bai lanaldiko ezbeharrak, bai 'in itinere' gertatutakoak, bai berriro gaixotzeak. Lanaldiko istripuak 12.237 izan ziren (+%11,4) eta 'in itinere' zenbatutakoak 1.545 (+%15,7). Lanaldiko istripu guztietatik 12.152 arinak izan ziren (+%11), 71 larriak (+%73) eta 14 hilgarriak (2023an hamabi izan ziren). 'In itinere' ezbehar arinak 1.529 izan ziren (+%15), 13 larri izan ziren (zortzi 2023an) eta hiru hildako izan ziren (urte bat lehenago ere ez).

Lanaldian ezbehar-tasa handiena izan zuen sektorea Zerbitzuak izan zen (6.596 istripu), ondoren Industria (3.939 ezbehar), Eraikuntza (1.496 istripu) eta Nekazaritza, Abeltzaintza eta Arrantza (206 baja).

Bestalde, EAEn baja eragin zuten 581 gaixotasun profesional berri zenbatu zituen urteko lehen lau hilabeteetan, hau da, %18,3ko igoera izan zuen 2023ko aldi berean zenbatutakoekin alderatuta. Baja eragin ez zuten gaixotasun profesionalen kasuak 667 izan ziren, 2023an zenbatutako 535 kasuak baino % 24,7 gehiago.