Milaka herritarrek hartu dituzte Gasteizko kaleak martxoaren 3an

Milaka herritar bildu ziren atzo Gasteizko kaleetan duela 50 urte Espainiako Poliziak egindako langile sarraskia salatzeko. Sarraskia, 1976ko martxoaren 3an, Gasteizko Zaramaga auzoan izan zen. Hilabete luzeetako protesten ondoren, hirugarren greba eguna zen Arabako hiriburuan: enpresetako langileek, ikasleek, irakasleek... bat egin zuten deialdiarekin, eta jende ugari atera zen kalera, lan baldintza hobeak eskatzeko. Protesten artean, San Frantzisko elizaren barruan bilduta zeuden milaka langile, eta orduan gertatu zen sarraskia: Espainiako Poliziak negar gasa bota zien, bertatik aterarazteko. Langileak bertatik atera nahian ari zirela, poliziak tiroka hasi ziren: bost langile hil zituzten, eta ehundik gora zauritu.

Langile sarraskiaren 50. urteurrena zela-eta, bloke bat egin zuen arratsaldean JARKI antolakunde iraultzaileak, "Kapitalaren erasoen aurrean, borrokak darrai!" lelopean. San Fratzisko elizatik abiatu eta Gasteizko Katedral Berrian amaitu zen mobilizazioa. Manifestazioaren zehar, "Herriak ez du barkatuko", "Euskal Herri Langilea aurrera", "Independentzia, Sozialismoa" eta "Policía asesina" oihukatu zuten, besteak beste, eta duela mende erdia Espainiako Poliziak eraildako bost beharginen irudiak izan ziren moblizazioaren buruan. Ondoren, Martxoak 3 elkarteak eta ELA, LAB, ESK eta Steilas sindikatuek antolatuta, manifestazio laburra egin zuten Andre Maria Zuriaren plazaraino.